Thawngthar: KIA Le PDF Phu Fonh Nih Ralhrang Sakhan An Lak, Hriamnam Tam Tak An Lak Khawh

Putao myone, Suanpian khua i SAC ralhrang sakhan cu nihin February 1, zinglei suimilam 10:30 hrawng ah KIA le PDF phu fonh nih an lak tiah theih a si. Sakhan chungah hriamnam tampi le ralhrang pakhat an tlaih ti si. SAC ralhrang phu pawl hram an bunhnak sakhan cu KIA le PDF phu nih an lak hnu ah mei an khangh tiah khuami hna le cu hmun he naihniam pakhat nih The 74 media ah a chim.

“Suanpian khua i SAC ralhrang sakhan cu KIA nih zeihmanh tanter loin mei an khangh dih. Atu hi meikhu zong a tho rih ko” tiah a chim. Cu sakhan an doh i an hrawk khawh hnuah Sinkah tlang cung i SAC ralhrang sakhan pakhat zong cu KIA le PDF phu fonh nih an doh than tiah a cung mipa nih a chim. Putao PDF facebook cahmai nih cun,

Lungsian khua chung i sakhan pawl zong hmunhma thianhnak an tuah chih kho i, ralhrang sakhan le palek sakhan zong mei an khangh tiah a tarlangh ve. “Suanpi he meng 5 hrawng a hlatnak ah a ummi Sinkah tlang timi hmun ah a ummi SAC ralhrang sakhan pakhat an kah than. Atu zong an doh ko rih” tiah a cunglei minlanghter a duh lomi pa nih chim hi a si.

Putao myone cu minung 60000 leng hrawng umnak a si i, Suanpian khua hi milu 1000 leng an umnak khua a si tiah theih a si. The 74 Media nih a tarlangh hi a si.

Nihin Putao Myone Chug Inn kangh thawngpang: Nihin Februay 1 ni ah Putao khuapi ah inn 2 a kangh tiah theih a si. Thil sining cu Putao khuapi, Dottan sang (2), High School hnu lei ah a ummi khuami inn pahnih cu nihin chun suimilam 2 hrawng ah mei a kangh tiah theih a si. Inn mei a kangh lio ahhin inn chung ah ahohmanh an um lo lio caan a si i,

Mei a kanghnak ruang zong theih a si rih lo tiah minlanghter a duhlomi Putao khuami pakhat nih The 74 Media ah a chim. “Minung an um lo lio ah a kangmi a si tikah, zeitindah mei aa thawk timi zong chimh kho a si rih lo. Inn ngeitu ram lak a kal lio ah a kangh hi a si. Dot 2 inn pakhat le rua inn pakhat an ciam dih” tiah a chim hi a si.

District Fire Force motor 2 nih mei an hmit nain an hmit kho lo in an inn 2 ning in a ciam dih tiah a cung mipa nih a chim chih. Putao myone, Manse Ohsu le Mansekhun Ohsu zong ah kan hnu 2021 kum March thla lio ah ni 2 chung ram mei a rak kang bal cang tiah theih a si. Ref: The 74 Media