Thawngthar: Mipi Caah Mipi Ralkap Nih Canaan Hospital An On Piak Cang Hna

Karenni ramkulh, Demawso myone chung ah mipi ngandamnak izohkhenhnak caah People Defense Force – Demawso (DMO-PDF) phu cawlhcanghnak area chung a ummi khua pakhat ah Canaan tiah min pek in siizung pakhat cu nizan January 24 ni ah an on tiah DVB nih a tarlangh. Siizung tuanvo ngeitu pakhat nih,

“Kanmah Karenni ramkulh chung ah SAC ralhrang phu le local mipi ralkap PDF hna kar kahdohnak fah a chuak. Cu tikah mipi hna cu ralzam dirhmun in an zam dih caah ngandamnak lei izohkhenh khawh a si ti lo. Cu tikah, mipi hna an herhmi ngandamnak kong ah hmual ngei tein rian aa tuan khawhnak hnga Canaan siizung kan onmi a si” tiah a chim hi a si.

Karenni ramkulh cu SAC ralhrang phu hna nih ke ralkap, thli ralkap, hriamnam ngan (Amyauk) ralkap, Tank motor ralkap hna he tiah thazaang tam tak hmang in a doh ruangah an khualipi Loikaw telh in Demawso, Phruso, Shartaw myone hna chung ah kahdohnak fah an chuak hi a si. Cu kahdohnak ruangah inn le lo kaltak in a zammi hi a sing (ting) lei an phan i,

Ngandamnak lei izohkhenhnak kong ah harsatnak an tong lio ah mipi ralkap PDF phu hna hruainak in tu bantukin mipi caah siizung (Canaan siizung), sii peknak siikhan ti bantuk an kan tuahpiak caah mipi caah bochan awk tlak hrimhrim an si tiah khuami hna nih an chim. DVB nih a tarlangh. “Ralhrang nih uknak an lak hnu ah,”

“Kanmah khuami nih sii inn, sii peknak siikhan tibantuk a dihlak ti awk in an phit dih. SAC ralhrang phu nih le offensive in ral an doh. Hriamnam ngan in khua hna an kah. khuami inn hna mei an khangh. Khuami zong a ruang um lo in an thah tibantuk pehzulh in an tuah peng rih caah ngandamnak lei riantuantu vuanthan pawl zong ahohmanh um ngam loin an zam dih hna.”

“Kum upa hna, naupawimi hna le ngakchia hna caah izohternak siikhan a um ti lo. Atu bantukin People Defense Force – Demawso (DMO – PDF) phu nih ngandamnak izohkhenhnak kong ah mipi kan harsatnak phising piak ding in siizung an kan tuah piak caah kan i lawmh i tampi kan bochan ko hna” tiah khuami pakhat nih a chim.

Canaan siizung cu People Defense Force – Demawso (DMO – PDF) nih a hruai i ngandamnak lei department in CDM a tuahmi vuanthan pawl, siibawi pawl, sii lei siangngakchia hna le nurse saya/sayamah hna le khuanu khuapa hna ifonh in onmi a si tiah theih a si. Demawso peng hi ralhrang nih biatak tein an dohnak a si nain, mipi ralkap PDF nih tu bantukin an control ko hna. Ref: DVB