Thawngthar: Nihin Karenni Ramkulh Ah Uico Ralhrang 30, Helicop 1 Le Raltuknak Tank 1 An Ciamter Dih Hna

Nihin Karenni ramkulh chung kahdohnak hna ah SAC ralhrang 30 an thi i raltuknak Tank motor chung a thimi, Kwunya dawr hmai a thimi hna an ruak pawl hmuh an si i, raltuknak helicopter pakhat zong a kah thlak pinah raltuknak Tank motor pakhat zong ciam lak in an khangh tiah Karenni lei nih thawngthanhnak an tuah.

Karenni ramkulh, Demawso myone, 5 mile, 6 mile, Dawposi in Loikaw myone, Mainglung le Pankan sang tiang ah nihin kahdohnak a fah ngai i, SAC ralhrang phu lei in 30 an thi pinah an hriamnam tampi lak a si tiah an phuan. Cu pinah raltuknak helicopter 1 an kah thlak i raltuknak tank motor pakhat meikangh in a rawk tiah KNDF phu nih phung ning tein thawngthanhnak an tuah ti si.

Zinglei suimilam 8 hrawng ah SAC ralhrang helicopter pakhat a ra in an kah lio ah KNDF lei nih an kap thlak hi a si i, Loikaw myo, Dawmukala khua pawng ah a tla i a kang tiah theih a si. Cu kahdohnak chung ah SAC ralhrang phu lei in Bo renk pakhat telh in a tlawmbik 30 an thi i, tampi nih hliamhma an tuar pinah cu kahdohnak chung ah SAC ralhrang phu tank motor pakhat zong,

Mei a kangh i a rawk tiah theih theih a si. Cu pinah KNDF lei nih cu kahdohnak ah hriamnam zun 10 le hriamnam ngan kuan le hriamhme kuan ceukhat zong an lak khawh tiah theih a si. SAC ralhrang lei in a thimi an tam caah helicopter le raltuknak jet vanlawng 2 hmang in bomb an thlak i, chun suimilam 2 in zanlei suimilam 7 tiang jet vanlawng le helicopter in voi 10 hrawng an kah tiah theih a si.

SAC ralhrang phu lei in thazaang tampi he tank motor tiang hmang in an doh nain an sungh thiamthiam caah 5 mile, 6 mile le Dawposi in khuapi chung lei ah hnu an tolh tiah theih a si. SAC ralhrang phu hna cu sang chung i khuami inn hna an baoh i an thilri pawl an lak hna pinah Canter motor 2 zong an fir chih tiah theih a si.

Cu pinah cu sang hna thiamthiam ah khuami inndong 10 leng mei an khangh hna ti si. Demawso myone, Ngwetaungse pawng hrawnghrang le Demawso myoma polish station zong ah kahdohnak a chuak i SAC ralhrang lei in hliamhma tuar an tam tiah theih a si.

Nihin Loikaw khuapi kahdohnak chung ah SAC ralhrang pawl an dohnak ah PDF-Loikaw lei in pasaltha pakhat nih ram le miphun caah a nunnak a pek ti zong in theih a si. Nihin Myanmar ram chung kahdohnak ah uico ralhrang a thimi theih khawh tawk cu 91 an si i, fehter kho rih lomi zong an um hna. Ref: KTM