Thawngthar: PDF Phufonh Nih Pyosawhti Pawl Raltuk Training An Kainak Hmun An Phomh

Thawngthar: PDF Phufonh Nih Pyosawhti Pawl Raltuk Training An Kainak Hmun An Doh: Sagaing ramthen, Pale myone, Ziphyu kung khu ah nizan January 28 ni zanlei sang ah SAC ralhrang phu nih training an peknak Pyosawhti phu raltuk training an kainak hmun cu People Defense Force phu hna nih an kah tiah khuami hna sin theih a si. DVB nih a tarlangh.

Ziphyu kung khua ah hmunhma a khuarmi Pyosawhti training a kaimi hna le SAC ralhrang phu hna cu, Zanlei sang ah an lut hnawh i an kahmi a si i, Local People Defense Force phu nih tanglei he cung lei in drone hmang in bomb hna an thlah hnawh hna tiah theih a si. Pale Pyauk Kyar phu hruaitu nih “Kanmah nih atu bantuk a biapi in kan dohmi cu hi hna (SAC ralhrang) nih Pyosawhti pawl raltuk training an pek hna.

Pyosawhti pawl training an pekmi hi kanmah Pale myone chung ah hmunhma 3 ah an pek. A dang hmun 2 cu Pale myo khuapi chung le Kandaungh ah training an pek hna” tiah a chim. Pale Pyauk Kyar phu he a tantimi phu hna cu Pale Myone People Defense Force, Aung San Force, Thanmanih – MPDF, PRA le Chindwin Attack Force phu hna fonh nih an doh hi a si.

Atu training hmunhma an dohnak hi zan a si cang caah SAC ralhrang phu lei in a thimi zat theih a si rih lo i, Local PDF phu lei in cun a thimi le hliamtuar an um hraw lo tiah Pale Pyauk Kyar Force phu nih an chim. Nizan an dohnak hmun ah hin SAC ralhrang le Pyosawhti phu dihlak minung 50 hrawng an um i, tampi an thi kho men nain zan kahdohnak a si caah a thimi zat an fehter kho rih lo ti a si.

Suimilam cheu chung kahdohnak a chuak nak ah tanti PDF phu lei in him tein hnu an tolh kho ti a si. Pale myone ahhin SAC ralhrang phu le PDF phu hna kar kahdohnak a fah ngai i, nizan ah Pale in chaklei zog ah SAC ralhrang phu nih cung lei he tang lei in PDF pawl an kawl timi thawngpang a len ti si.

Cu caah khuami thong tampi cu thinphang in an um i khuami cheukhat cu a himnak hmun ah zam colh ding in, Timhtuah cia in an um hna tiah khuami chimhnak in theih a si tiah DVB nih a tarlangh hi a si. Pale myone chung ah hin Local PDF phufonh hna nih SAC ralhrang biatak tein an doh i SAC ralhrang phu lei zong nih thazaang tam tak chap in cung he tang he PDF phu an doh ve nak myone a si. Ref: DVB