Thawngthar: Thantaung PDF Phu Nih Ralhrang 10 Nak Tlawmlo An Thah Than E

Thantaung PDF Phu Nih Ralhrang 10 Nak Tlawmlo An Thah: KNU Tatmaha 2 area chung ah SAC ralhrang Khamayah 411 phu le Thantaung PDF phu kar kahdohnak a chuak i SAC ralhrang phu lei in 10 nak tlawmlo an thi tiah theih a si. Tu lio cu hi bantuk thawngpang hi mipi caah thawngpang a si ko. Kayin National Union KNU Tatmaha 2 area, Taungngu district chung ah,

Naypyidaw hrambunh SAC ralhrang phu Khamayah 411 Tatzing le Northern Thantaung Defense Force (NTDF) phu kar ah nizhan January 27 ni, zinglei suimilam 11 hrawng ah kahdohnak a chuak i SAC ralhrang phu lei in 10 nak tlawmlo an thi pinah hliamhma tuarmi zong an tam tiah NTDF nih thawngthanhnak an tuah hi a si.

Thantaung Gyi myone, Kyue Kyah Lay khua le Minlantaung khua kar ah minung thazaang 80 hrawng a simi Khamayah 411 ralhrang phu, Chinpataung ralkap sakhan in ralhrang phu hna le U Ko Gyi hruaimi Northern Thantaung Defense Force (NTDF) phu kar kahdohnak a chuak mi ruangah Chinpataung sakhan lei in hriamnam ngan in an hong kah caah,

Minlantaung khua ah inn pakhat a rawk ti si. Cu kahdohnak ah Northern Thantaung Defense Force (NTDF) phu lei in hliamhma tuarmi um hraw loin hnu an tolh kho tiah theih a si. January 20 ni zong ah Northern Thantaung Defense Force (NTDF) pawl cawlhcanghnak area chung ah CDM (Civil Disobedience Movement) tuahtu pawl le PDF (People’s Defense Force) phu pawl kan kawl ti phun in,

Northern Thantaung Defense Force (NTDF) cawlhcanghnak area chung a lutmi SAC ralhrang phu le Northern Thantaung Defense Force (NTDF) phu kar ah January 20 ni lio ah kahdohnak fah a rak chuak i SAC ralhrang phu lei in 4 an rak thi pinah 9 nih hliamhma an tuar i hnu an tolh than tiah Northern Thantaung Defense Force (NTDF) nih a langhter.

U Ko Gyi hruaimi Northern Thantaung Defense Force phu hna cu Karen National Union (KNU) in an chuak i Myanmar ralkap he kahdaihnak a rak sermi phu pakhat an si i, Min Aung Hlaing hruaimi SAC ralhrang phu nih hramhram in uknak an lak hnu ah SAC ralhrang phu a doh thanmi mipi ralkap phu pakhat an si ve tiah Khit Thit Media nih a tarlangh hi a si. Ref: Khit Thit Media