Hi bia hi an chungkhar nih an bochan ngaimi an fapa upabik a tlau caah a thaizan ah a chungkhar hna sin phone call a lut i an theihmi bia a si tiah Zalen media nih a tarlanghmi a si. Thil sining cu January 27 ni ah Kalay myo Thazin sang ah a ummi pa cu Tahan veng, Haimual motor gate pawng ah a ummi a pi inn ah a va len i, zan suimilam 6 pm hrawng ah,
An inn lei a rak tinmi kum 19 minung Chin mino pakhat cu inn lei phan ti loin a tlau. Cu zan ah an chungkhat hna nih palek sakhan ah mitlau kan ngei tiah theihternak an tuah i siizung le zung dangdang hna ah an kawl len hna nain an hmu kho lo. January 28 zan, suimilam 8 le 9 kar hrawng ah an chungkhar sin phone call a lut i pa aw in,
“Hi hi (anite) in nan si maw? Kyat ting 40 in maw nan rak tlanh lai? Asiloah, amah hi dah kan thah lai?” tiah a chim i phone a chiah ti a si. Cu ti cun a chungkhar hna cu lung rethei in an um i January 29 ni ah Ihkhun 100 ralkap siizung an va kal in an kherhhlai tikah an kawlmi ruak cu mithi ruak an chiahnak hmun ah plastic in an tom i hri an temmi a ruak cu an va hmuh chuah.
An pum an hlainak a um lo ti si. Kan Chin miphun, kum 19 pate ruak an lak lio ahhin phaisa hal cu a um lo. Aa tlaihmi phone, aa chitmi 125 motorcycle a thar ai ah, 125 motorcycle a hlunmi an pek hna ti si. A ruak pum cung i a hliamhma dirhmun cu a biang a phing, a hnar ruk a kiak. A kut hi hri ttemmi bantukin a kawknak hliamhma a um.
A cavarhlei a keng in meithal kuan a lutnak hliamhma pakhat a um i, a paw lei ah kuan a chuahnak hliamhma pakhat a um. Amah hi tlakrawk nenthiammi a si i, a chungkhar a cawmtu a si. Hrintu pa a ngei ti lo i zunthlum le thi kai zawtnak a ngeimi hrintu nu le a naule pa pakhat le nu pakhat a cawmtu an chungkhar nih an bochan ngaimi mifel pakhat a si tiah Zalen nih a tarlangh hi a si.
Hi hi Zalen nih kawl in a tialmi aa tlak ning in leh chimi a si. Chin miphun nih hi bantuk tiangtiang kan ton cang. Zalen nih Chin mi a ti nain, ralhrang nih an thahmi pa hi a min a langhter chih lo caah ka langhter ve lonak a si. Credit: Zalen
Leave a Reply