TRRC Phu Nih Thantlang Peng Ralzam Hna An I Dornak Khua 5 Ah Kyat 300 Man Thilri Bawmhnak An Pek

TRRC Phu Nih Thantlang Peng Ralzam Hna An I Dornak Khua 5 Ah Kyat 300 Man Thilri Bawmhnak An Pek: Thantlang peng chung ralzam hna an i dawrnak khua khua 5 ah Thantlang Relief and Reconstruction Committee (TRRC) phu nih an herhmi thilri pawl cu nihin January 14 ni ah a voi 2nak bawmhnak an pek than hna tiah theih a si.

Thantlang khuapi in Zanaak tlang, Khuahring tlang, Bual, Vailam tlang le Vanzaang tlang tibantuk khua 5 ah ramzam pawl an i dor i, Thantlang Relief and Reconstruction Committee (TRRC) phu nih an herhmi thilri, um le kheng pawl le puan pawl cu motor 3 khat lak in a voi 2nak bawmhnak an pek hi a si i, tu lio thil man in tuak ahcun Kyat sing 300 man hrawng a si tiah theih a si.

Cu bawmhnak thilri pawl a hluttu cu Korea in pastor Phet Sun (Kyonebwe) le a hawile hna, Mandalay in Rev. Simon Thawng Hmung le a hawile hna le Hakha Red Cross phu hna nih an tawlrel in an phawt hna tiah theih a si. Thantlang khuapi chung ah September thla thok in kahdohnak le inn le biakinn pawl khangh a chuak caah khuapi chung mipi hna cu,

India ram lei ah siseh, Thantlang peng chung khuate hna le Myanmar ram chung khua dangdang hna ah an zam i, Thantlang khuapi cu minung um loin an zam tak dih hna. Thantlang khuapi chung khuami inn, biakinn, biaknak he aa pehtlaihmi inn pawl, dawr hna tibantuk an khanghmi dihlak hi 650 hrawng a si cang i,

Nihin ni tiang khua chung ah khuami kir in khua sak ngam a si rih lo pinah khuapi zam tak dih in a himnak hmun ah an um rih hi a si. Nihin ah Thantlang khuapi cu SAC ralhrang phu nih an duh caan paoh ah an duh ning in an khangh lengmang rih ko hna. Kawlram chung ah inn tampi khanghmi khuapi zong a si cang. Ref: Chin World