February 15 ahkhan Tuluk ram in Kawlram ah ramkaltu Embassador Mr. Chen Hai cu The Voice, Eleven, 7Day, Myanmar Times le Frontier hna nih ca in biahalnak an tuah. Cu ah cun Tuluk nih a tulio ah Ralkap Council nih an tlaih mi Daw Suu le President Win Myint cu a rannak in thlah ding tiah hawiphung sakel bang a hung chim ve. Uknak an lak hnu ni 15 ceo ah hi bia a hung chim a si. Cu leng ah naihrawng hi Tuluk Ramkalzung (Embassy) hmai ah mipi nih an but i, hehchet tiah au hnawh an tong.
“Kan in ngiat ko hih, zei na tuah kan hngalh ko” tiah nifatin an auhnawh cang. Kan hnu ah Min Aung Hlaing le Tuluk zeidah an tuah tiah ka rak tial. Kawlram ah vawleicung vanlawng luhchuahnak an khar dih nain Kuming khua in Yangon ah nifatin ti awk in vanlawng a zuan peng mi hi khuaruahhar ngai le biahalnak tuah lo awk a tha lo mi asi. Cu lak ah zaanfatin Internet an kan phih kanh mi zong hi ruah a phu.Hong Kong pro-democracy activist a si i, kum 23 ah lawmaker a tling mi Hong Kong minote nih tuhrawng Kawlram ah internet line an thah lengmang mi hi sullam a ngei. Internet firewall sernak ding ca ah le Twitter, NYT, FB pawl phihnak ding ca ah hin internet phih hi a herh hrimhrim mi a si tiah a phuan.
Hong Kong ah a cang mi a si tiah a ti fawn.Tuluk in nifatin vanlawng a chuaklut fawn, IT thiamsang an i tel tiah an ti fawn. Internet a pit lengmang fawn. Cu ca ah Tuluk nih hin Ralkap hi technical support a pek ko ti hi lunghrinh awk hrimhrim a si.Asi ne ah ziah Tuluk hi nizaan nai a lung ai thum bang? Zei ko dah a lung ai thumhnak a si hnga ti hi ruah awk a si ve ka ti. Tuchun ah US Navy nih an facebook page ah US raltuknak USS Tehodore Roosevelt pi cu South China Rili ah a lut cang tiah thawng a hun thanh. French nuclear submarine zong tuzarh ahkhan a phan ve ti a si. UK zong an nuclear phurtu tilawng thar dakmak te a hun i thawh cang ti a si. Cucu, Tuluk hi US le a hawikom ram pawl nih Taiwan le South China Sea buainak ah cawl kholo in an hun thihphaih cang tinak khi a si.
Cu lawng siloin, USS Russel zong South China sea ah a lut cang fawn. Vawleicung ramthawng tha pawl hi bia an i ruah tikah power hmang in bia an i ruah. Atulio Kawlram buainak caan ah South China Sea ah US le a hawikom ram pawl an hung phak mi hi sullam ngeih ngaingai dawh a si. Kawlram kong ah chaktlai a si ko tiah ruah mi Tuluk an hun naih i power in bia i ruah dawh an si. US nih Kawl ralkap uknak lak mi cu US ram ca ah national emergency a thanh fawn. Ai biatak a lang. A tu zong a lang chinchin. Nifantin ti awk in US embassy zung nih cathanh an chuah.
Biden le acozah nih kawlram buainak hi lamnaih tein an ngiat ko ti a langh lawng siloin, chaktlaitu Tuluk a hun naih cuahmah mi hi khuaruahhar ngai thil a si. Hi pawl ruang ahhin hlah maw nizaan nai hrawng Tuluk lungthumh hram ai thawk tiah ruah khawh a si. Nihin ah USS Theodore Roosevelt tlawng pi South China Sea ah a hung luh tikah hna Tuluk siseh, General Min Aung Hlaing siseh, a hnircang hna hnga maw ti hi a ralai mi nitlawmpal ahhin an tuahsernak ah a lang te kho mi a si. US lawng cu i rinh awk a tha ruam lo. US hi Kawlram buainak kong ah ai biatak.
Cu ca ah mipi zong kan i biatak a herh taktak. CDM zong tei kan rial rih a herh chinchin. Kan ttanlak thathawhnak tu siseh. Kan lung a dong sual ai lai ti hi phan a um hringhran. Lailei ah CDM a tha a zor lei a panh pah tithawng kan theih. Tha cu a chia lo nain, thin a phang. Tutan hi ngamh tein ralchanh caan a si. Ralkap kehleng phelh tu cu cozah riantuan nan si. A dirhthoh tu nan si sual ahcun hivialte kan karhlan hi a hlawh a tling lai lo i, dictatorship tang ah kan lut than ko lai. CDM hi tawhfung a si ko. Rampi a hmailei, Gen Z 5 million kan hmailei le next generation hmailei, kan ram damnak le aa-na-sin kuttang in luatnak caantha tu CDM tuah khotu hna nan kutcung ah tambik ai hngat ko. Kan sin ah dir ko sawh u! Hero nan si.- Salai Tial Hram Ling
Leave a Reply