Uico Ralhrang Nih An Kah That

U Phoe Tun Cu Ralhrang Nih A Ruang Um Loin An Kah That: SAS ralhrang uico pawl hi an sual chin lengmang ko. Minung pakhat nunnak thah hi an i fawih tuk cang. Sagaing ramthen, Kalay myo thlanglei ah a ummi Tharsi khua chung ah tu zing meithal puah pah in a rak lut mi SAC ralhrang phu nih Tharsi khuami U Phoe Tun cu a ruang um loin an kah that tiah theih a si.

“Tharsi khuami U Phoe Tun, kum 46 minung a si. Uico ralkap nih an kah that i, khua chung in an chuak. Shwe Kyaung Daw khua helnak lam in nitlak lei ah an chuak. An dihlak ke in an kal hna. Hriamnam tling an ngei. RPG he, sinpyaung he, an sakhan lei a kirmi an si lai ka zumh” tiah khuami pakhat nih Yangon Khit Thit Media ah a chim hi a si.

Tu zing suimilam 10 am hrawng ah Kalay myo in thlanglei mengkhat hrawng a hlatnak ah a ummi Tharsi khua ah SAC ralhrang phu an lut i an meithal kahmi ruangah khuami 2 hliamhma an tuar. Nu telh in a tlawmbik minung 6 hrawng an tlaih i an velh hna tiah mit hmutu hna zong nih an chim ve ti asi.

“Tharsi khua ah khuami pakaht kahthat a si. Inn 2 nak tlawmlo mei a kang. An tlaihmi hna chung in nu pawl cu an dihlak in an thlah than dih hna. Atu hi khuami dihlak zam a si tikah minung pazeizat an tlaih timi kan theih fian lo” tiah Local media nih a langhter. SAC ralhrang phu hna le an kuttang um Pyosawhti phu hna telh in minung thazaang 80 hrawng phu cu,

Tharsi khua, Pauktaw sang i phungki sianginn ah suimilam 3 hrawng hmunhma an khuar i, nihin chun suimilam 1 hrawnghrang ah khua chung in an chuak ti si. Local PDF phu he zong kahdohnak a um theng lo i, hramhram in khua chung an lut i mi an thah an tlaih i an velh hna hi a si tiah theih a si. Ref: KTM