UN General Secretary Nih Taliban Pawl Nawlnak A Tuah

(Afghanistan ram cu Taliban tapung nih an lak cang i an rammi chungkhar cheukhat cu ei le din an harsa tuk caah ei le din ding i cawknak ah an fale an zuar cang hna ti si.) Afghanistan ram ah sifah harsa ngai in a ummi mizapi caah United Nations General Secretary Antonio Guterres nih Afghanistan ram a uktu Taliban pawl cu nawlnak a tuah hna tiah Delta News Agency nih a tarlangh.

Atu hi Taliban ralhrang tapung pawl nih an uk cangmi Afghanistan ram ah cun nu pawl le ngakchia pawl hna cu a chiakha bikmi nuhrin covo buarnak lak ah an um lio a si. Cucaah United Nations General Secretary Antonio Guterres nih Taliban pawl nih nu le ngakchia hna an nuhrin covo kong ah vawlei cung ram hna nih zumh awk tlak in nan um awk a si tiah nawlnak a tuah hna hi a si.

Antonio Guterres nih theihternak a chimmi ning ahcun atu lio hi Taliban nih ukmi Afghanistan ram chung ah rammi chungkhar hna nih an fale an zuar i ei le din icawk khawh an i zuam tiah theih a si. Cu pinah nu pawl nuhrin covo kong ah lungtho tein a aupitu le cawlcangtu hna kha Taliban pawl nih an tlaih i an hren hna tibantuk thinphang dirhmun a si caah,

Minung cung i zaangfahnak a ngeimi, minung kan si cio cu ta ti lungput ngeih ding in United Nations General Secretary Antonio Guterres nih Taliban pawl a nawl hna ti si. Atu hi Taliban ukmi Afghanistan rammi cheuhnih ah cheukhat cu ei le din harsa ngai in an um caah vawlei cung ram hna nih bawmhnak pek cio kho ding in United Nations zong nih an forhfial hna tiah theih a si. Ref: DNA