UN Secretary General Antonio Guterres Nih Kawlram Kong A Biapi In Chiah A Herhnak Kong A Chimmi: Kawlram kong hi a biapi in phising a herh cang tiah United Nations Secretary General Antonio Guterres nih a chim tiah Delta News Agency nih a tarlangh.
Nizan ah United Nation zungpi ah tuahmi thawngfianhnak puai ah UN GS nih atu bantukin a chim tiah Secretary General aiah a pahnihnak chimhnak nawlngeitu Farhan Had (Deputy Spokesman for the Secretary General) nih a chim chin hi a si.
Ralhrang phu nih hramhram in nawlngeihnak an laknak kum khat chung ah thahnawnnak le zaang en in itinak fakpi in a chuak i nuhrin covo buarnak te hna, humanitarian lei in buaibainak te hna le ei le din harnak te hna rang ngai in a hung karh chin caah Kawlram chung ah a zeilei paoh in harnak a chuak bantukin an ram chung dihlak in an tuar cang caah,
Hi kong hi a biapi in zuan hnawh in phising a herh cang tiah a chim hi a si. SAC ralhrang phu nih hramhram in uknak an lak ni, Nihin ah UN Secretary General Antonio Guterres nih Kawlrammi mizapi an tuarnak ka tuarpi ve hna ti zong in a chim ti si. Rohingyas pawl telh in Kawlram chung miphun dihlak caah an nun a him i,
An dihlak an iteltum khawhmi sociaty pakht an si khawhnak hnga, a rammi hna nih Democracy an i ruahchanhmi ca tiang in kan dirpi hna ti zong in a chim chih tiah theih a si. Kawlrammi mizapi hna caah a fekmi a phi a chuak khawhnak a herh i, hriamtlai phu dihlak zong nih mizapi zalennak le nuhrin covo nan upat a herh ve ti zong in a chim chih.
Kawlram chung ah hin bawmh a herhmi 14.4 million an um cang i anmah vialte bawmhnak pek khawh ding in program thar zong an suai i, cu program thar caah a herhmi phaisa hi Dollar 826 million a herh ti zong in United Nations Secretary General Antonio Guterres nih a chim tiah Delta News Agency a tarlangh ning in theih a si. Ref: DNA
Leave a Reply