Gangaw In A Rak Kaimi SAC Ralkap Hna Cu Sakta Khua Lei Panh In Hmai An Nor: Chin ralkap hna nih fak ngai in a ṭhuat mi SAC ralkap hna cu Hakha peng Malsawm khua in Sakta khua lei panh in an cawlcang cuahmah, tiah theih a si.
Hi kong he pehtlai in, “Tutan Gangaw lei a rak kai mi hna hi tat-ma 77 an si. Kan ram chung an phak bakin nifatin kan i kap i tam ngai cu kan fimhlawm khawh hna. Atu hi Malsawm khua in Sakta khua lei an panh,” tiah min langhter duh lo ralram um pakhat nih a chim.
Gangaw lei in a kaimi tatma 77 hna hi anmah lawng nih Hakha an phak khawh lo ca ah Hakha hrambunh 266 in minung 100 leng nih an don hna i Nipi khua pawngkam ah an um, tiah theih a si.
CNA tat-ma-har 5 hmun i kahnak ahhin SAC nih nifatin in Jet Fighter an hman, tiah theih a si. (Hmanthlak: Ramthlo le Chuncung kar i Chin ralkap nih an hrawh mi SAC ralkap motor). Credit: The Chin Post
Adang rel chih ding: CNF/A hi 100% in kan dirkamh a herh bak hi: CNF/A nih 2023 dothlennak caah $25million an tukmi cu mipi le Khrihfabu nih lungawitawmnak umlo tein kan thawh cio a hau. Teinak co kan duh taktak ko ahcun harsattuk ko buin zongin mitchinh kamseh zongin tutan te hi cu i zuam cio hram hna usih.
Dothlennak timi hi cu thil fawi a si hrimhrim lo, kan duh zong duh lo zongah kan zawn chuak a si caah zei a si hmanh ah saupi kan dirkhawh tilo zongah tukum tal hi cu kan i zuam rih cu a herh tuk ko hi! Voikhat pek ah $1,200 pek cun zapi caah cun a foi lai lo caah, thlakhat ah $100 tete in pek a fawi deuh lai.
Keizong tuthla in ka thok ve lai thlakhat ah $100 tete in ka pek lai. Pengtlang thawhbur, khua thawhbur, Khrihfabu le ulenau he cun thil foi a si hrimhrim lo, asinain zeikanti hnga tukum tal hi cu i seng hram rih ko hna usih. Tukum chungah cun hriamnam thattukmi an ngeih khawh cang lai,
Vanlawng kahnak tiangin an ngeih khawh ko cang lai. Tukum chungah hin tlangcungmi hriamtlaiphu vialte lakah tihnungbik ah an i chuah khawhnak dingah cun tukum tal hi cu harsattuk buin tan kan lak rih a hau cio ko lai hi. CNA zong nih biatak tein rian an tuan cang timi hmuh khawh asi, tha a thơ ngaingai cang.
Amahbelte an thawngpang thuh viar an i timh sual peng asi ahcun $25 million project hmuhnak zong tampi a hnursuan khawh lai. Mipi thazaang tuk asi timi ruat buin langhter awk a tha ko mi cu langhter lengmang ko hna seh. Anmah lawngin cun rian a tuan kho an si tung lo,
Kum 35 chung rian an tuần nain zei pipa an tuah kho tuk lo. 2021 i ralhrang doh thok hnu in mipi nih Vaurawng le mipi awan in social media hmang in pei an bawmh le an thawn ko cu. Dr. Lian Hmung Sakhong cu ram a buai hlan ah US ah a thla tampi caam in CNA caah states tampi cul in tlang a rak au,
Cu ahcun $60,000 lawng a rak hmuh khawh. Tu ahcun CDM, CDF, CNA le mah khua cio dothlennak ah $100 million cu an hmuh cang lai dah. Kha vialte kha mipi thazaang asi i social media ah tamtuk in thazaang an i lak caah an suithi tiangin an zuar mi asi. Vaurawng le Chinland Club zong đồngcat loin nan meifar kan van piak ko rih u,
CNA zong zeipaoh thuh viar nan i timhmi kha kan hlauh piak ulaw mipi nih tunak thazaang tam chinchin kan ngeih khawhnak hnga nan Meithal le nan ralruknak kong pawl Live tlangau lawng siloin photo le video zong in kan hmuhter ko rih u. Dothlennak cu phunkhat lawngin tei khawh asi lo,
Hla he bia he, media he, catial nak he, thinlung he ralhrang hi doh thiam a herhmi asi. MAH nihhin CNA le CDF nakin mipi nih CNA/CDF an support dingmi hi a tik bikmi a si. Ralhriamnam nak hmanh in media in mipi thazaang pek lai hi a tih deuh lai, cucu dictatorship kal tawn ning le an tih bikmi a si.
Phone line a phih zungzalnak le media vialte tlaih dih dingin a kawl zungzal hna i, Internet a phih lengmang nak a ruang cu social media hmang in mipi nih thazaang an i lak lai a phan bia a si cuh. Ramdang in phaisa tlawmte nan thawh I order nan kan pek chih, nan phaisa hi maw nan i hngalsak? tiin biachim hmang kan pa le cheukhat pawl nan bia le bang kha cu, kha bantuk bia kha a chim chim ti hlah u.
Tulio evangelist cheukhat Pathian hmanh a sii ngam ding nan lo, nan rian a si lo, kanmah kan um ko, kha pawl kha cu mipi nih a herh ning in an ti ko hna lai. Mipi an fimtuk cang hna i a luanmi cu nanmah ti herh loin mipi nih faktuk in an ti ko hna. CDF zong hi thazaang kan pek rih hna a herh ko rih.
CNA nih an tuah khawh lomi thil an tuah khawhmi a um ve thiam. Rampumpi ralhrang kap hmasabiktu cu Kalay mipi an si i a changtu ah Mindat mipi an si. Hi lio ahhin hriamtlaiphu vialte nih zeitindah kan um lai i zei lam dah kan zulh lai timi biakhiahnak hmanh an rak ngeih taktak kho rih lo.
CDF hi hmete hmanh sehlaw mupi nih khuabu a lak khawhlonak dingah biatak tein a rak khamtu le dothlennak ah miphun le CNA caah bawmtu tha le a biapi tukmi an si. CDF hi CNA he 100% in an dirti awk a si i an dirti lai zong ka zumh. Cun CDF hi 60% tluk cu CNA nawl an ngeih ding a si, cu zong cu an zulh lai ka zumh.
100% cu an zulh khawh lai le zulh duh lai ka zum lo i tlawmpal cu anmah duhning in an cawl ve cu a herh mi pei a si cu. Adonghnak ah chim ka duhmi cu CDF, PDF le mipi ralkap sawhsawh hi cu dothlennak a dih cun a dih dingmi an si ve. CNA lawng hi caan dong tiang a dir dingmi kan ralkap hmun dingmi cu an si timi hi philh lo ding.
Buaibainak le miphun buainak kong zongah riantuan le biakhiahtu kan ralkap an si lai caah kan lungthin dihlak le thazaang dihlak in tampi hrimhrim a herhmi an si. CNA dawt cu miphun dawt a si tining law ka palh kai lo, asinain lungtlinlonak nan ngeih ahcun nan duhnak cu chim cio ko u ca freedom of speech ti pei asi cu.
Dohdal le huat phun belte hi cu a sining ai đang diam ve caah kha cu phun dangpi asi ko. Cucaah CNA cu a lamkip in thazaang pe ko hna usih. Credit: Chelsea Bawi
Leave a Reply