Ralkap nih uknak an lak mi le duh lonak lamzawh kong he pehtlai in ramkip ah duh lonak lam zawh le US siseh, UN sin ambassador hna hmai ah duh lonak langhter lio cuhamah a si.
Hi lio caan ah upa dang lo, mino dang lo, facebook cahmai ah UN/ US ralkap training an tuahnak hmanthlak tar le a ruah hlan ah kawlram an phan lai, ralkap an tongh cang hna lai tiah mah ruahnak in catial le ca post kan hman mi hi a poi tuk. upa pipi zong nih nan facebook times line ah heh tiah na tar, nan share. catial tu hna nih rinh canhtlak cherhchan mi zong ngei loin YouTube ah a video download mi hmang in thih pheih phun in catar a tamtuk. Atu lio caan ah i capo phun le i hro phun caan le i hlen caan, i forh caan zong a si rih lo.
US nih kan duh ning in hriamnam a hamng lai lo, US ralkap cu kawl ralkap bantuk lungput ngei mi an si lo, mifim le cathiam an tampi. atu kan catial ning le kawl ram mi nih siseh tiah kan duh ning in US ralkap nih rian a tuan lai lo. Cun US ralkap cu forh khawh miphun an si lo. anmah nih a za an timi cung ah raltha tein thil tuah mi an si. US nih ramdang a tuk ning ruat hmanh usih.
President hlun W. Bush nih Iraq a tuk nak cu Iraq ram uktu Sadam Husein nih America ram khuapi Washington hrawh ding in timhnak lak a ngeih ruang ah le Iraq ram nih US ram hi a doh peng, ralhrang a bawmh hna, Nuclear zulh phung a zulh lo caah le Zinan a chuahnak ram a si caah US nih caan tha lak in a tuk mi a si.
President hlun Obama nih Bin laden le a ram Afghanistan a tuknak cu kan theih cio bang US ram inn sang bik a hrawh piak hna i minung a thong an nunnak a liam. Cun Bin laden cu ralhrang a si pin ah US a thlerh khawnh lengmang caah a tuk mi a si.
President hlun Donald Trump nih Iran ram thiamsang le ralbawi ngan Suleimani a thahnak cu Nuclear hriamnam zulhphung a zulh lo ruang, US ram a tlerh khawngh lengmang, US ram hawikom Israel ram kah ding a dir onh peng caah US nih a tuk nak a si.
A cunglei US nih ral a tuknak hi zoh hmanh, US le vawlei pi caah ral a si mi lawng a tuk hna. Kawl ralkap nih US ralkap cu a tlerh bal lo, US cung ah sualnak a tuah ve lo caah US nih veto power cun a tu bal lai lo. Hriamnam hmang loin dan cu a tat ve ko lai.
US nih a tuk ding hmanh ah chawlehthalnak lei mit in a tuk hnga. cu zong cu Myanmar ram ah a miat ding mi a tuak lai i a miat a hmuh lo ding ahcun a tu fawn lai lo. Kawlram cu sui le ngun a chuak ko nain US nih a tuk zong ah a covo a tlawm lai. a ruang cu ralkap nih Tuluk sin ah kum tampi ca in cahren fek tein Tuluk ram ah a pawn dih cang mi a sicaah US nih a tuk zong ah US caah hlawnak a um lo caah a tu lai lo. zeicatiah ram pakhat tuknak caah tangka US dollar million bak in a dih ding a si.
Cun 2020 US ram thimnak ah Tuluk nih hin Joe Biden hi a bawmh mi a si caah Joe Biden nih hriamnam cun Tuluk ram hawi a si mi kawlram hi atu lai lo. tuk a duh hmanh ah UN ralkap sin ah tuanvo a pek lai. UN ralkap nih tuk ding zong ah UN chungtel hnatlaknak a herh. UN zong nih ramchung ramkheel lei buainak kongah a tu fawn lai lo. a tuk zong ah UN phung buar, Nuhrin covo buar ti bantuk le UN phungbuarinak tete tha angeih lawng ah a tuk lai. UN ralkap le US ralkap le a dang hna zong khi kawl ralkap bantuk in a hrut mi le a sual mi an si lo. khua fak piin a ruat mi ralkap le a fim thiam mi an si. Thaawngdik lo ca kan tial tik ah US ralkap le ramdang karlak ca zong ah a tha lo.
Cucaah kawlram mi nih kan duh ning in rian an tuan lai lo. cun forh khawh mi zong a si lo. an zoh lai i aa tlak ning in dan an tat ko lai. cu bantuk in upa pipi hna zong nih a herh lo ah US ralkap an phan deng cang ti bantuk hna catial le post hi hrial hna usih. US le UN nih thil sining ngiathlai tu an ngeih ve i a tha bik in an khan ko. kan rian cu ralkap uknak duh lonak lamzawh le ralkap doh ah thazaang chuah ko hna usih. Cred : Rolian
Leave a Reply