Tu ni hi ka caah ni sung lawi a si khun. High school ka rak kai lio te i Bawipa nih vision a ka pek mi, tuah chim lo ruah ding hmanh ah ka zenh mi cu, tu chun ah a tling.
Kum nga (5) hnu, Yale University a tu ka kai ah, Bawipa nih thluachuah a ka pek i ka vision cu mit hmuh, kut tongh in a tlin ter cang. Cucaah, tu chun hi official te in David Stanley Foundation cu kan dirh khawh cang tiah thawng kan thanh hna.
Hi kan tuahnak chan cu kan Lai miphun (Chin mi), a hlei in kan mino hna caah, an duhmi (an passionate mi) an zulh khawhnak ding caah hin a si. Cu a si khawh nak ah cun, scholarship hi phun li (4) in ka tthen: hmanthlak suai ($1000), ca ttial ($1000), film/baisikup zeih ($1000), leh hlaphuah/hlasak ($1000) hi an si. Mah lawng si lo in, tu kum cu Kawlram kan ton mi thil he pehtlai in, CDM lei hrim hrim in kan scholarship cu kan hoih. Cun, hi area pawl ka thimnak chan cu, keimah hrim hrim nih ka uar mi lawng an si lo in, ka tuah mi an si ve fawn tikah, zetin dah kan Lai mino hna nih kan tthancho khawh chin chin lai ti in, ruahchannak he ka tuahmi a si.
Thuk deuh in chim ahcun, ka nu (Lal Zui Lian) le ka pa (Than Tling) thawng in a si ve fawn. Kan hngakchiat te in, ka nu le ka pa nih i zuamnak lungthin, hawi caah dawtnak ngeihnak lungthin, leh Bawipa hi zeizong vial te ah i bochan ding hrim hrim hi chim lawng chim si lo in, an nunnak in a kan cawnpiak. Ka nau le keimah kan dir khawh nak ding ah siseh, fim cawn khawh nak ding ah siseh, tthancho khawh nak ding ah siseh, an in mi (sacrifice) le an tuar mi hi chim cawk zong a si lo. A kan dawtnak hi a lian ngan tuk hring hran. Zeihmanh kan neih lo lio caan zong ah, zeipoah a kan pe tu ka nu le ka pa an si. Ka rak i thoknak camera te hmanh har ngai bu te in a ka cawpiak tu ka nu le ka pa an si. An mah tuah ser nak ruang ah, hi foundation hi a chuahnak a si fawn.
Cu ve bantukin, hi David Stanley Foundation nih hin, mah lungthin le ruahnak i tlaih ve in kal kan i tim. A donghnak ahcun, hi foundation min in zeizong vialte kan ruahmi siseh, kan tuah mi siseh, Bawipa sunparnak caah si hram ko seh. Zeicahtiah, Bawipa lo in zei hmanh a si kho lo.
Cucaah, nan sin ah hi kong ka chim tik ah, ka lung aa lawm hring hran. June thla 2021 ah Yale University in ka kum hnih (2) nak ka van lim bak te in, thla hnih chung summer classes kai pah in siseh, mitkuh vuai pah lo in siseh, video har le fe te in ka nau he kan khan hme te ah kan zeihnak in siseh, kan Lai mino hna caah hi kan tinhmi a tlin ter tu Bawipa cu ka thangtthat!
A donghnak ah, hi scholarship apply a duhmi hna caah, kan website cu “davidstanleyfoundation.org” asi. Mah ka ahcun zulh ding mi le tuah ding mi cu kan fianh hna. Hi kan page (David Stanley Foundation) zong hi rak zulh ding in kan in sawm chih fawn hna.
Kan miphun le, a hlei in, Bawipa sunparnak caah si hram ko seh.
-@David Stanley
The Chin Post
Leave a Reply