Very Good News: Hakha lei a panh cuahmah mi SAC Ralkap pawl cu Kalay le Gangaw mipi nih an kah

May 3 le 4 ah Kalay lei in Hakha lei ah an rak pok tiah an zumhmi SAC ralkap pawl cu Kalay peng chung ah le Gangaw peng chung ah mipi nih lampi ah an kah hna, tiah thawng kan theih.

Kalaymyo Peng Kahdohnak

May 3, zaanlei sml. 5:00 hrawng ah Kalaymyo he meng 33 aa hlatnak Saetaw khua pawng i Nyaungchaung donhlei ah zawn ah mipi nih Hakha lei rat a timmi SAC ralkap pawl an kah hna.

Kahdohnak ah aa telmi minung pakhat nih, “Motor 11 in an si. Hakha lei ah an kal i Gangaw lei nih lampi ah an rak kah hna. Cucaah, Kalay lei ah an rak kir tthan i Ngyaungchaung hlei ah Kalay mipi runvengtu bu (KRDA) nih kan kah ve hna,” tiah Irrawaddy thawngzamhnak ah a chim.

Ngyaungchawng kahdohnak hi suimilam pathum chung hrawng a rau. Zaan sml. 8:00 hrawng SAC ralkap pawl cu Kalay lei ah an vung kir.

SAC lei nih ralkap a thimi pahnih an um bang in KRDA lei in minung pakhat a thih le a nun theih loin a tlau, tiah KRDA nih an chim.

Gangaw-Hakha-Kalay Lamton Bomb Puahnak

March 4 chun ah Kalay in Hakha lei ah kai an tim tiah an zumhmi SAC ralkap motor 8 cu Gangaw peng chung Hakha-Gangaw-Kalay lei kalnak lamthum aa tonnak hmun ah bomb puah hnawh an tong, tiah Myanmar Now nih a ttial.

Gangaw khuami pakhat nih, “Kalay lei in a rak rami SAC ralkap motor 8 bomb in an puah hnawh. Gangaw peng chung i Hakha le Kalay lei kalnak lamtthen ah khan a si. Ralkap a thimi zong an um tiah an ti,” tiah a chim.

“Mah SAC ralkap motor pawl hi Hakha lei ah kal a timmi an si tiah kan zumh. Atu cu Gangaw khuachung ah an rak lut,” tiah a chim chap.

Htilin Kahdohnak

Gangaw peng le Chin ramri ah a ummi Gangaw peng chung i Htilin khua kahdohnak hi a fak ngaingai.

May 3 zinglei sml. 7:00 ah Htilin khuachung i peng fimcawnnak zung ah bomb a puak i, sml. 8:00 thawk in Htilin he meng 3 a hlatnak Htanpyinkung khuate pawng ah SAC ralkap le Htilin mipi kahdohnak a chuak.

Kahdohnak hi zinglei sml. 8:00 in sml. 10:00 tiang a rau. Mipi lei in kum 50 le kum 40 a simi pa pahnih an nunnak a liam i, SAC ralkap lei nih minung 4 an thi.

Kahdohnak a chuah hnu ah Htanpyinkung khuate ah SAC ralkap 40 hrawng a thar in an rak chap hna i, pehzul in kahdohnak a um kho tiah mipi lei nih Myanmar Now sin ah an chim.

The Chin Journal