Nihin ram le miphun caah a nunnak a petu pasaltha CNA Bokhat Salai Cung Lian Sang hi capo saih thiam le mi nuamter a thiam ngaimi pei a rak si hi. Saya Henry Nawl Thang Bik nih a facebook ah nihin a nunnak a liammi CNA Bokhat Salai Cung Lian Sang capo saihnak video a tarmi zoh ah mi capo saih thiam le mi nuamhter a thiammi a sinak hmuh khawh a si.
Saya Henry Nawlthangbik Hlawnceu nih cun a video tar chih in, “Kawi Cong, ka nau, kan in philh kho lai lo! Mi na nuamhpi. Nov 14, 2017, Denmark kal kaa thawh nan ka thlah lio. Nangmah philh lonak ah.Capo na chim ah kan inuam tuk tawn nain nihin cu kan nih kho lo e, nau. Na liam siaherh laici. Miphun caah nunnak thap in Pasalṭha le Ralbawi thih in fawh na thih hih” tiah a tarlanghmi hmuh a si.
Rev. Thawng Tha Thang zong nih, “Ka siangakchia a rak si mi, mi nuntha le mi nuamhter a thiam tuk mi Victor nih ram le miphun ca i a nun a pek cu upatnak sang bik kan pek bu in sian lonak le ngaihchiatnak in kan khat ko. Dinfelnak ram, Vanram nuam ah rak i din chung kho law” tiah CNA Bokhat Salai Cung Lian Sang hmanthlak tar chih i capo a saihthiamnak le a sianlonak a tarlangh ve.
Nihin kan ralkap nih an a thihnak Kahdohnak cu a tanglei bantukin a si. Nihin, 22.01.2022, zinglei sml 8 hrawng ahkhan Kawl ralhrang nih Helicopter pahnih in Chin ralkap țangți umnak Taingen khua le Hiangzing khua karlak cu a kah thluahmah. Helicopter a hman hlan ahhin ramri Kalay University ummi Ralhrang hna nih Sml 7.00AM ahkhan 120 MM Mortar in voi 17 hrawng Laitlang lei an kah thluahmah ta.
Chin ralkap țangți lei in a thi aa hliam an um le um lo theih si rih lo. Hmaisuang a ummi Chin ralkap țangți (CNA, CDM Siyin, PDF Zoland, Kalay PDF 3 , Kalay PDF 8, Kalay PDF 9, PDA,Zongam Army, CDF KKG-2) hna caah biatak in thlacampiak an hau e. Ahnubik ah kan Chin ralkap țangți hna hnu an pil. Kawl ralhrang lei zong in 40 hrawng thi ve ti si.
Hiangzing khua aa taapmi Kawl Ralhrang hna bawmtu ding ah Tedim lei in Nizan khan ZRA le Kawl ralhrang minung 100 hrawng an ra i, tuzing Sml 8 in zanlei Sml 5 tiang Chin ralkap țangți hna he i kahdohnak a faak ngaingai. Chin ralkap țangți umnak Taingen khua pawngkam cu hnuhmai in ZRA le Kawl ralhrang nih an erhtonh hna.
Kalaymyo lei in Miakpi in Taingen khua cu voi tamtuk an kah, culawng loin ralhrang nih Helicopter in suimilam cheu chung an kah hna. Hriamnam aa thlau tuk caah Chin ralkap țangți (CNA, CDM Siyin, PDF Zoland, Kalay PDF 3 , Kalay PDF 8, Kalay PDF 9, PDA,Zongam Army, CDF KKG-2 ) hna nih Taingen khua cu zanlei 5 ahkhan an chuah taak chung. I kahdohnak ah ralhrang minung 40 an thi.
Mipi ralkap cu ralhrang kuan cun aa hliam le a thi an um lo nain CNA pakhat le PDF Zoland in pakhat cu Bomb an kamhnak ah an i puah sual i an nunnak a liam. Hi hi nihin kan ralkap hna an nunnak tiang pek in ral an dohnak thawngpang cu a si. Atangah nihin a nunnak a liammi Salai Cung Lian Sang capo saihnak video tawi zoh ding tar chih a si. VIDEO ZOHNAK. Video Credited.
Leave a Reply