Hi hi Ceu Ham Hp ni a facebook ah video in a chimmi a si. A chimmi cheukhat te kan van langhter chih nain a tangbik ah a video link chiah chih a si i, ngai khawh a si lai. A chimmi; Hi bia hi keimah nih ka tlinh ruang ah, ka thiam ruangah ka chimmi a si lo. Keimah cu misual, mi tlinlo, Bawipa hmaiah mi chambau ka si. Nan dihlak, kan miphun dihlak hmai ah ka tlinh ruangah a si lo.
Bawipa nih a ka daw le a ka zaangfah ve ruangah Pathian sin ah kan miphun nih kan thlacamnak a kan leh i, keimah pumpak telh in kan miphun dihlak nih an kan cawnpiakmi bia a si caah, keimah bia a si lo, nangmah le keimah kan sertu le a kan neitu vancung i a ummi Pathian bia a si caah hi bia vialte hi i nunpi khawh le zulh khawh ding caah thlacamnak te he van ngaih kha i tim hna u sih ti kha a pakhatnak ah chim ka duh.
Pathian bia, 2022 kumthar zan ah khan, kaa hngilh kho ti lo. Pathian bia cu ka thinlung chung ah a ra thluahmah. Bia chimh in a van kan chim tikah khan ka khuaruah a har. Bawipa, hi na bia hi keimah nih ka tlinh khawhmi a si lo. Sihmanhsehlaw, keimah pa nih chim awh ah a har tuk ko. Sihmanhsehlaw, Bawipa, na bia a si ahcun ka chim ko lai.
Cucaah cun tehte ka theihter than ko ka ti i, Bawipa sin ah thla ka cam. Nithum chung Bawipa ka hal than. Zan thum chung Bawipa sin ka hal than bantuk tein a zanthum ning tein Pathian bia cu a ra than. Nithum le zanthum Pathian bia cu dik tein a ra tikah, hi hi Pathian bia a si ko tiah ka confirm i chim lo awk tha loin a um caah,
Kumthar 22 chung, January, a thlakhatnak a dih hlan ah hi bia hi chim ding a si caah kan Hakha khuapi chung ah cun ka si khawh tawk in ka aupi cang. Atu ah miphun vialte nan dih lak sin ah online tein ka van au ta. Cu Pathian bia cu zeidah si kan ti a si ahcun, sermon le a dihthlir in ka chim lai lo. ISAIAH 32:1-4; ISAIAH 32:16-17; ROM 8:6-8; JEIM 2:1-4; EFESA 4:25; GALATI 5:16 an si lai i,
Hi Pathian bia te hi nangmah na umnak hmun te ah thlacamnak te he rel rak i zuam law, kan nunpi khawhnak hnga, hi ka pum, sualnak in a khatmi pumsa sinak vialte hi Pathian Thlarau thawng in kan thlah i, mah le mah i tei khawhnak kan ngei i, Pathian dinhnak kan hrawm khawhnak ding ah, Bawipa nih thluachuahnak kan pe ko seh.
2022 ah nan zulh dingmi tiah a ti i, 2019 in atu tiang hi zawtnak a tlung i cu zawtnak cu a dih rua lai kan ti i, ral a hung chuah chih. ral nih an kan den tikah kan khuaci a mui. Zeitin kan thu kan dir lai Minung tampi cu hi ka hin kan um ah a tha hnga maw, khika ah kan kal ah a tha hnga maw tiah thutdirhnak hmanh hngal loin khuakhan lairel kan thiam lo lio caan a si.
Chungkhar, inn le pa kan i then hna. Chungkhar cheukhat ah thihlohnak tampi a tlung. Cucaah 2022 ahcun Bawipa luatnak kan pe ko tiah thla kan cam. Cucaah ruahchanhnak nganpi he 2022 kan hngak cio. Bawipa bia a rami cu, ka miphun hna, nannih cu Israel mi hna bang tuk in ka miphun ah thimmi nan si. Cucaah cun 2022 kum ah cun hi hi nan zulh dingmi a si.
Ram hi a thurhnawm tuk cang caah Keimah nih ka thenh mi a si. Cucaah 2022 chung ahcun hi bia hi ka miphun vialte nih nan zulh hrimhrim lai tiah a ti i, cu a chimmi bia cu, 1nak. Ahohmanh nih Lih nan chim lai lo. Lih chim nan ngol cang lai tiah Bawipa nih thawng na thanh hna lai tiah a ka ti. Ramchung dihlak ah, Khrihfa upa si hna seh, uktu hruaitu, khua upa hna si hna seh, chungkhar ah siseh, lih nan chim lai lo, biatak tu kha nan chim lai a ti.
2nak. Nan fir lai lo, pakhat le pakhat a thli tein thil nan i tuahpiak lai lo. 3nak. Ziknawh einak nan lak ah nan tuah lai lo. Ziknawh einak hi ka duh lomi a si ati. Cucaah zihnawh ei ruahnak lungthin nan ngei lai lo. 4nak. Nan lak ah thleidannak nan ngeih lai lo. Keimah cu tleidan a hmangmi Pathian ka si lo le, cucaah nan lak ah thleidannak nan um ter lai lo.
5nak. Nan iporhlawt lai lo. Porhlawt ruamkai hrimhrim hi ka duh lomi a si. Cucaah cun ka hmaika ahohmanh aa porhlaw khomi nan um lo. Toidornak lungthin he pakhat le pakhat i hmuh thiam, i chawnh thiam ding nan si e, cucaah cun porhlawtnak ruamkainak nan lak ah nan umter hrimhrim lai lo tiah a ti. 6nak hi a chim chih lo.
7nak, Dinhnak nan tuah lai. Keimah cu dinhnak a ngeimi a si i, nuhme ngaktah ka thleidan hna lo e, din tein bia a ceihtu ka si e. Cucaah nan lak ah dinhnak hi tiva bantukin nan luanter lai. Dinnak nan tuah hnu lawnglawng ah teinak kan pek hna lai tiah Bawipa nih a ti. Hi vialte hi Ceu Ham Hp nih a chimmi a si i, tling deuh in theih a duhmi caah a video ngai chih khawh ding in video zohnak link kan chiah piak chih hna. VIDEO ZOHNAK.
Video: Ceu Ham hp
Leave a Reply