Corona Virus Hi Tuluk Nih An Ser Mi A Si Tiah A Thanh Cang-COVID- 19 hi Wuhan thil hneksaknak in a chuak mi a si ti cu US nih a pom i tha tein hlathlainak tuah dingah President Biden nih US intelligence hna cu a fial hna tiah US intelligence Office chimhnak nawlngeitu Amanda Schoch nih a chim.
US President hlun Donald Trump nih Covid zatnak hi Tuluk nih a ser mi a si tiah a rak chim bal nain WHO mithiam pawl nih Wuhan ah hlathlainak an va tuah hnu ah Covid zawtnak cu saram in a mah tein a rak chuak mi zawtnak phun khat a si tiah fiang huaha lo in an chim.
Tuluk nih WHO hlathlaitu phu pawl Wuhan ah kal ding hi a rak sianh hna lo nain ramdang pawl hneksaknak ruangah an luh ter mi hna a si. Hlathlainak zong tha tein a tuahter lo pin ah an cathanh zong Tuluk nih a zoh dih hnuah an chuah mi a si tiah Trump nih a rak chim hnuah WHO he tuanti nak zong a rak chah dih.
Joe Biden President a si hnuah WHO hmuhning hi a pom bantukin WHO he pehtlaihnak zong ngeih than a si. A sinain Covid-19 zawtnak hi saram in zeitik hmanhah a chuak kho mi a si lo tiah hlathlaitu mithiam pawl nih an chim hnuah atu bantukin hlathlainak tha deuh ngeih dingin nawl a chuah mi hi a si.
Mithiam pawl nih an chim ningah Wuhan hneksaknak hmun in Tuluk nih Chemical hriam ser an timh mi a si lai. Zapi theih in Covid-19 zawtnak a than hlan ah Wuhan thil hneksaknak hmunah a tuan mi cheukhat hna cu thawchuahnak lei harsatnak ruangah a thi mi le mizaw an rak um cang tiah siizung cazin in kan theih tiah US intelligence pawl nih an fehter.
Joe Biden nih a tubantuk a thanh caah chawhlehnak, South China Sea le Kawlram kong he pehtlaih in an i rem lonak pinah Corona virus kongah an i rem lonak cu a zual chinchin lai tiah ruah a si. Covid-19 ruangah vulei cungah mi tampi an thih caah US President biachim mi nih ramdang tampi nih US cawlcanghnak zoh cio a si.
Joe Biden nih a ram hawi hna cu “Covid hramthawknak cu Wuhan a si” ti mi hlathlainak ah bawmh cio dingin a sawm hna.Tuluk zong nih Covid cu China in a chuak mi a si timi kong cu a phehpeng bantukin USA in a chuak mi a si tiah a puh ve. Crd:CNN, The Chin Post
Leave a Reply