ZRA Nih PDF-Zoland Hruaitu Pakhat An Thah

Chin ramkulh Tidim khua ah PDF-Zoland hruaitu pakhat a simi Pa Cin Sian Sum cu khuachung i aa thuhnak inn ah meithal in voihnih an kah i a nunnak  a liam tiah theih a si. PDF-Zoland hruaitu a si ve mi Ko Khual nih “Kan theih ning ah voihnih an kah. A ṭaang ah voikhat, cun a lu ah voikhat an kah” tiah a chim.

An kah ni le caan cu Dec 5, zinglei ah khan a si. Pu Cin Sian Sum hi kum 38 a si i PDF-Zoland ah training le mithar kawlnak ṭuanvo a latu a si. Fa pathum a ngeimi a si. Dec 6 ah khan a ruak vuinak an tuah tiah theih a si.

Pu Cin Sian Sum a kaptu cu India-Myanmar ramri ah a cawlcangmi Zomi Revolutionary Army (ZRA) an si tiah theih a si. November thla dih ah khan ZRA nih an minung pakhat a tlau nak kongah Pu Cin Sian Sum cu biaruah kan in duh tiin Dec 4 ah mi pakhat thlah in an rak chimh i Pu Cin Sian Sum nih cun nan minung tlau nak kongah PDF-Zoland kan i rawlh lo, ka ngandamnak a ṭhatlo caah ka ra kho lai lo tiah a leh hna.

ZRA cu 1993 ah dirhmi a si. Kum 2005 ah India cozah i ramri hngak ralkap ah an thlen i Manipur ah hram an bunh. Ralhrang nih nawlngeihnak an lak hnu in ZRA nih ralhrang uknak cu a hram in hrawh dingah kan doh lai tiah an thanh ko nain ralhrang doh dingah ser thar mi tualchung hriamtlai bu hna cu an rem hna lo i atu le atu an kah hna.

May 22, 2021 ah Tidim khua i PDF (Tidim) dirh dingin aa pum mi mino hna umnak cu ZRA nih an doh hna i meithal zun 5, phone, camera telh in sing 30 man thilri an hrawh piak hna. Cun Jun 16 zongah khan ZFU-Zoland riahbuk pakhat cu ZRA nih an kah ṭhan i Lai meithal zun 5, sii-ai le thilri dang tampi sing 60 man an hrawh piak fawn hna. Cu hnu Jun 17 ah kan hmunhma chungah zei bantuk hriamtlai bu hmanh dirh kan duh lo tiah ZRA nih an thanh. 

Cun Tidim peng chungah tualchung hriamtlai bu dirh aa tim mi Hualngo mino hna riahbuk zong Sept 21 ah khan ZRA nih an kah hoi.

PDF-Zoland hruaitu pakhat Ko Khual nih cun “A kan hruaitu pakhat a um ti lo hnu zongah PDF-Zoland cu hmasa bantukin ram le miphun caah kan dir peng ko lai” tiah a chim. Ref: Myanmar Now

The Chin Post