Zualko: Hmaithla ah nau a ngei dingmi Pi Vansangpuii cu Covid-19 zawtnak in a nunnak a liam

Hmaithla ah nau a nei dingmi Pi Vansangpuii, New vengpui, Lawngtlai cu Aizawl Zoram Medical College- ZMC an panh pi lio Mualthuam North ah a nunnak a liam. Pi Vansangpuii hi nizaan ah Lawngtlai ah Covid-19 zawtnak a ngei ti theih a si. Hmaithla ah nau ngei cang ding a si caah Lawngtlai cozah sii-inn ah nau ngeihter dingin timhlamh a si nain ZMC ah chanh a si.

Lampi ah an oxygen a dihdeng ti an theih caah tuzing suimilam 3:30 hrawngah khan Lunglei ah oxygen pek a si hnuah Aizawl lei lanhpi a si.Saichhoh an phanh ah an mawtaw a rawh pinah an oxygen zong a dih deng hawi caah Haulawng PHC nih oxygen an va chanh hna hnuah an lanhpi than nain sau an kal hlan Mualthuam North khua phak lai ah a nunnak a liam.

Pi Vansangpuii ruak hi Lunglei sii-inn ah a herhmi vialte tuah a si hnuah Lawngtlai lei ah kirpi a si lai. Pi Vansangpuii hi Covid-19 ruangah Lawngtlai ah a nunnak a liam minung pathumnak a si.

The Chin Post