Mizoram i Khrihfabu minthang pakhat ‘Kohhran Thianghlim’ timi dirhtu, Dr. LB Sailo cu nizan October 10, chunhnu suimilam 2:15 ah khan Ebenezer Hospital, Aizawl ah a nunnak a liam.
Dr. LB Sailo hi zunthlum, thikai zawtnak le kalfah a ngei i nikum October khan Ebenezer Hospital ah hin a rak i zohkhenh cang. Tukum August 20 khan ICU ah chiah hau in a zaw i a thihni October 10 tiang ICU ah hin a um, tiah JB news nih a tial.
Dr. LB Sailo hi Vety doctor (saram siibawi) a si. Mizoram cozah AH&Vety Department ah Director rian a tuan i kum 2016 ah khan pension a la. Kum 1982 ah khan Pathian riantuan hram a thok i kum 1984 January 1 ah ‘Kohhran Thianghlim’ timi bu cu a dirh. A thihni tiang hin Kohhran Thianghlim ah Church chairman rian a tuan piak hna.
Kohhran Thianghlim hi Mizoram leng ah India ram le vawleicung Khrihfabu ah cun a min thang ve mi a si. Khrihfabu dang he aa lo lomi phungphai tete an ngeimi le an biakinn dawh, Solomon’s Temple hna cu a min thang ngaimi a si. Solomon’s Temple, Kohhran Thianghlim biakinn hi Cawlhhmun sang, Aizawl ah a ummi a si.
By. Tluanga Zathang (TCP’s Reporter for LADC, Mizoram)
Leave a Reply