Zualko: Nihin Kalaymyo Kahdohnak Ah PDF Kalay 2 Nih Ram Le Miphun Ca An Nunnak An Pek

February 2, 2022: Nihin Kalaymyo Kahdohnak Ah PDF Kalay 2 Nih Ram Le Miphun Ca An Nunnak An Pek: Sagaing ramthen, Kalay myo ah cun nihin February 2 ni zong ah kahdohnak pehzulh in a chuak i, SAC ralhrang phu lei in a thimi an tam bantukin PDF Kalay lei in pasaltha 2 nih ram le miphun ca an nunnak an pek tiah PDF Kalay nih thawngthanhnak an tuah ning in theih a si.

Nihin zinglei sumilam 5 hrawng ah Kalay myo in thlanglei ah motor 7 in a kalmi SAC ralhrang phu motor hna cu Sithar khua le Natmyaung khua kar ah an dirter i, Natmyaung lei ah an ke in a kal lio ah PDF Kalay nih bomb 28 in an puah hnawh hna. Cu ti bomb an puah hnawhnak ah SAC ralhrang phu lei in minung 30 leng nih hliamhma an tuar i a thimi zong an um lai tiah zumh a si.

Cu ti cun bomb puah hnawhmi SAC ralhrang phu nih an duhduh in hriamnam ngan in an kah hnu ah bomb nih a hliamh mi hna an phur i Kalay myo thlanglei ah an kal ko tiah theih a si. Cu pinah SAC ralhrang motor 5 zong Kalay myo in tlanglei ah an kal rih i Kalay myone Technology University lei ah an lut i, Thayakung lei ah an kal hna caah chun suimilam 12 hrawng ah,

PDF Kalay le an i tong i kahdohnak a chuak i, cu kahdohnak cu suimilam pakhat hrawng a rau i, SAC ralhrang phu lei in hliamtuar an tam pinah PDF Kalay lei in pasaltha 2 nih hliamhma an tuar ve tiah theih a si. Niihn cu CDF – KKG phu le SAC ralhrang phu karkahdohnak a chuak i, SAC ralhrang phu lei in 3 an thi pinah tampi nih hliamhma an tuar tiah theih a si. Ref: DNA