Zualko : Tedim ah Ralkap nih Tlangval No Felix Thang Muan Lian an Kah

April 27 zaan ah Tedim khua Sakhollam sang datsii dawr pawng ah zaan runvennak tuah ding in a kalmi tlangval no Felix Thang Muan Lian (kum 20) cu SAC ralkap nih meithal in an kah caah a nunnak a liam, tiah Tedim thawngzamhnak pawl nih nihin an ttial.

Meithal kahnak in a nunnak a liammi Felix Thang Muan Lian hi Pu Hau Lian Thang le Pi Ciang Sian Lian i an fapa a si.

Felix Thang Muan Lian ruak cu Tedim General Hospital ah an chiah i, chungkhar nih a ruak an la kho rih lo.

Nizan ah Tedim khuachung ah suimilam pakhat dan in bomb voi hnih zong a puak, tiah kan theih. Cred : The Chin Journal

Relchap : Mindat ah a Thimi Myanmar Ralkap Pawl Ruakvuinak an Tuah Caah Kahdohnak a Dai

Mindat ah a thimi Myanmar SAC ralkap minung 20 leng ruakvuinak nihin ah an tuah caah kahdohnak caankarlak a dai i, ruakvuinak an tuah dih in kahdohnak a um tthan kho, tiah CDF-Mindat hruaitu pakhat nih a chim.

“Meng 27 zawn ah a thimi ralkap ruak pawl an thiar hna i nihin ah ruakvuinak an tuah. Ruakvuinak an tuah dih in thil sining zeidah a lawh lai kan thei rih lo,” tiah a chim.

Matupi lei in a rak rami SAC ralkap pawl cu CDF-Mindat nih meng 27 zawn in an kah hna i a thimi an tampi pin ah Mindat lei lan kho loin le Matupi lei kir kho loin an hren hna.

“Nizan ah SAC ralkap nih an tlaihmi Mindat mino 7 an thlah hna. Kanmah lei zong nih meng 27 ah kan hrenmi hna ralkap motor pathum lam kan onhpiak ve hna i, Pakukku lei ah kan kalter hna,” tiah a cunglei CDF-Mindat hruaitu nih a chim.

Mindat khua i SAC ralkap bu no. 274 hi CDF-Mindat nih an kulh dih hna i chuak kho loin an um. Cun, Mindat he meng 2 hrawng a hlatnak ah ralhriam ngan pawl he a rak rami ralkap pawl zong khuachung lut kho loin an hren hna.

Mindat in Kawlrawn lei vung tlaknak Kyauh-Htuh khua ah Mindat lei ah kai ding in ralkap zong an phan tthan i, Mindat lei an rak kai sual ah lampi ah kham i rak doh cio ding in CDF-Mindat nih forhfialnak an tuah.

April 24, 26 le 27 ah a cangmi Mindat kahdohnak ah SAC ralkap lei in minung 20 leng an thi, tiah CDF-Mindat nih thawng an thanh.

The Chin Journal